Rossiya Samarqandda bosh konsulxona ochadi

Rossiya Tashqi ishlar vazirligi bosh konsulxona ochish O‘zbekiston bilan kelishib olinganini ma’lum qildi.

Foto: Getty Images

Rossiya yaqin kelajakda xorijda ikkita elchixona va beshta bosh konsulxona ochadi. Bu haqda Rossiya tashqi ishlar vaziri o‘rinbosari Yevgeniy Ivanov «Komsomolskaya pravda» gazetasiga bergan intervyusida gapirdi.

«Burkina-Faso va Ekvator Gvineyasida elchixonalar, Kapan (Armaniston), Oqtou (Qozog‘iston), Samarqand (O‘zbekiston), Denpasar (Indoneziya) va Male (Maldiv orollari) shaharlarida bosh konsulxona ochish to‘g‘risida qarorlar allaqachon qabul qilingan va hukumatlar bilan kelishilgan», dedi diplomat.

Rossiya Tashqi ishlar vazirligi rahbari o‘rinbosarining ta’kidlashicha, Rossiya hukumati «do‘stona» mamlakatlar va Rossiya uchun muhim bo‘lgan geografik mintaqalarda joylashgan davlatlarda diplomatik ishtirokini kengaytiradi.