OAV: YeI Kiyev bilan a’zolik bo‘yicha muzokaralarni iyunda boshlamoqchi

Bryussel 25 iyun kuni Ukrainaning Yevropa Ittifoqiga qo‘shilishi bo‘yicha Kiyev bilan muzokaralarni boshlamoqchi. Bu haqda Amerikaning Politico nashri 21 may, seshanba kuni xabar berdi. Unda qayd etilishicha, YeI rahbariyati shu yo‘l bilan Ukrainani qo‘llab-quvvatlamoqchi. 

Dekabr oyida Yevropa kengashi rahbari Sharl Mishel Yevropa Ittifoqi Ukraina va Moldova bilan tashkilotga a’zo bo‘lish bo‘yicha muzokaralarni boshlashga qaror qilganini bildirgandi. Biroq protsedura Vengriya pozitsiyasi tufayli to‘xtatildi, deb yozadi Politico: gap shundaki, Budapesht Kiyevni mamlakat g‘arbida yashovchi venger ozchiligiga zulm qilishda ayblamoqda. Nashrning yozishicha, Ukraina ham, YeI ham hozir Vengriya bilan parda ortida faol muzokaralar olib bormoqda va bu to‘siqni bartaraf etishga harakat qilmoqda. 

Yevropalik diplomatlardan biri nashr bilan suhbatda Vengriya 6—9 iyun kunlari bo‘lib o‘tadigan Yevroparlamentga saylovlar oldidan Ukraina bilan a’zo bo‘lish bo‘yicha muzokaralarni blokdan chiqarishni istamaydi, chunki bu ularning natijalariga ta’sir qiladi, degan fikrni bildirdi. Boshqa tomondan, manbaning fikricha, Budapesht iyul oyida olti oylik Yevropa Ittifoqi kengashiga raislik qilgunga qadar bu muammoni hal etishni xohlaydi. 

Kiyev va Budapesht muzokaralari 

Ukraina prezidenti devonxonasi rahbari Andrey Yermak va Vengriya Tashqi ishlar vazirligi rahbari Peter Siyyartoning aprel oyida bo‘lib o‘tgan telefon suhbatlaridan so‘ng tomonlar muloqotda «ijobiy dinamika» borligini ma’lum qilishdi. Kiyev Budapesht o‘zaro kelishmovchiliklarni bartaraf etishni taklif qilayotgan ro‘yxatga javob berdi va endi Vengriyaning munosabatini kutmoqda, deb xabar qildi Politico diplomatik doiralardagi manbaga tayanib. 

Avvalroq, yanvar oyida Siyyarto va Yermak 100 mingga yaqin etnik venger istiqomat qiladigan Ukrainaning Karpatorti viloyati markazi Ujgorodda uchrashgan edi. O‘shanda Kiyev buni Ukraina prezidenti Volodimir Zelenskiy va Vengriya bosh vaziri Viktor Orban o‘rtasidagi shaxsiy uchrashuv yo‘lidagi «katta qadam» deb atadi. 

Ukraina 2022 yilda YeIga a’zolikka nomzod bo‘ldi 

Ukraina va Moldovaga Yevropa Ittifoqiga qo‘shilish uchun nomzod maqomi berish to‘g‘risidagi qaror 2022 yil iyun oyida bo‘lib o‘tgan YeI sammitida qabul qilingan edi. Yevropa komissiyasi yetti bosqichdan iborat dastur ishlab chiqdi, uni Ukraina a’zolikka tayyorlanish uchun bajarishi kerak. Bular, xususan, sud-huquq tizimini isloh qilish, korrupsiyaga qarshi kurash va deoligarxizatsiyadir.