19 yoshli Germaniya fuqarosi Rossiyadagi koloniyadan g‘oyib bo‘ldi

Germaniya va Rossiya fuqarosi 19 yoshli Kevin Lik Arxangelsk viloyatidagi 14-sonli axloq tuzatish koloniyasidan g‘oyib bo‘ldi. Bu haqda uning qo‘llab-quvvatlash guruhi Telegram-kanalida 30 iyul, seshanba kuni xabar berildi.

«Kevinning onasi Arxangelsk viloyati federal jazoni ijro etish xizmati muassasalariga oziq-ovqat yetkazib berish xizmatidan yigitning ko‘rsatilgan koloniyada yo‘qligi haqida javob oldi», deya ma’lumot berdi guruh. Likning onasi boshqa hech qanday bildirishnoma olmadi. 

2023 yil dekabr oyida Lik Adigeya Oliy sudi tomonidan davlatga xiyonat moddasi bo‘yicha to‘rt yillik qamoq jazosiga hukm qilindi. Tergov ma’lumotlariga ko‘ra, yigit go‘yoki «vizual kuzatuv o‘tkazgan» va rus qo‘shinlarining Maykopdagi joylashuvini suratga olgan, so‘ngra fotosuratlarni «xorijiy davlat vakillari»ga yuborgan. 

Rus siyosiy mahbuslarining koloniyalardan g‘oyib bo‘lishi 

Oxirgi bir necha kun ichida huquq himoyachilari tomonidan vijdon mahkumi yoki siyosiy mahbus deb tan olingan kamida besh kishi Rossiya koloniyalari va tergov hibsxonalaridan noma’lum manzilga olib ketilgani ma’lum bo‘ldi. Navalniyning Ufa va Tomskdagi shtablari sobiq rahbarlari Liliya Chanisheva va Kseniya Fadeyeva, siyosatchi Ilya Yashin va huquq himoyachisi Oleg Orlov «noma’lum tomonga» olib chiqib ketilgan. Rassom Sasha Skochilenkoning yaqinlariga qizni Moskvaga olib ketishganini aytishgan.