Nazarboyevning jiyani davlatga 1,6 mlrd dollar qiymatli mulklarni qaytardi

Qozog‘istonning Korrupsiyaga qarshi kurash xizmati sobiq prezident Nursulton Nazarboyevning jiyani Qayrat Sotiboldiuli tomonidan davlatga qaytarilgan mulklari ro‘yxatini taqdim etdi.

Sotiboldiuliga nisbatan qo‘zg‘atilgan jinoiy ishlar «Kazaktelekom» va «Transport servis markazi»dan o‘ta yirik miqdordagi mablag‘larni o‘g‘irlash, jinoiy yo‘l bilan olingan pul mablag‘lari va boshqa mol-mulkni legallashtirish, shuningdek, kompaniyalar tomonidan bojxona to‘lovlarini to‘lashdan bo‘yin tovlash holatlari bo‘yicha tergov qilindi.

«Tergov davomida Q.Sotiboldiuli o‘z aybiga to‘liq iqror bo‘ldi, yetkazilgan zararni to‘liq qopladi, shuningdek, jinoiy huquqbuzarliklarni tergov qilish va jinoiy yo‘l bilan olingan mol-mulkni fosh etishga hissa qo‘shdi. 2022 yildan hozirgi kunga qadar Sotiboldiuli va unga aloqador shaxslar tomonidan noqonuniy ravishda sotib olingan 732,8 milliard tenge yoki 1,6 milliard dollardan ortiq mol-mulk va mablag‘lar davlatga qaytarildi», deyiladi Antikorrupsiya qo‘mitasi xabarida.

Qo‘mita ma’lumotlariga ko‘ra, qaytarilgan aktivlar qatoriga ma’muriy binolar, eksklyuziv zargarlik buyumlari, hashamatli uylar, kvartiralar va avtomobillar, kompaniyalardagi ulushlar, temiryo‘llar va mablag‘lar, shu jumladan xorijdan olingan mablag‘lar kiradi.

Jumladan: «Kazaktelekom»ning 28,8 foiz aksiyasi (197 mln dollar), «Tss» AJ (63 mln dollar), to‘rtta kompaniyadagi ulush (21,6 mln dollar), Qozog‘istondagi mulkiy aktivlar (332,8 mln dollar), eksklyuziv zargarlik buyumlari (230 mln dollar), Qozog‘iston banklaridagi pullar (77 mln dollar), xorijdagi pullar (361,5 mln dollar), qimmatli qog‘ozlar (300 mln dollar).

Qayd qilinishicha, umumiy qiymati 331 mln dollardan ortiq bo‘lgan 115 ta obekt davlat mulkiga o‘tkazilgan, ulardan 73 tasi ko‘chmas mulk obekti: 13 ta uy, 10 ta bino, 13 ta yer uchastkasi, 4 ta xonadon, 3 ta bino, 2 ta madrasa binosi, 2 ta avtoturargoh, 25 ta bino, 1 ta qurilishi tugallanmagan obekt, 37 ta ko‘char mulk (29 ta avtomobil, 5 ta maxsus texnika, 3 ta kvadrosikl) va boshqa mol-mulk.

Mulkning bir qismi Sotiboldiulining yaqin qarindoshlari, manfaatdor shaxslar va nazorat ostidagi kompaniyalari nomiga rasmiylashtirilgan.

Ta’kidlanishicha, mablag‘lar davlat daromadiga aylantirilib, ijtimoiy maqsadlarga yo‘naltiriladi.

2022 yil 13 martda Korrupsiyaga qarshi kurash xizmati Qayrat Sotiboldiuli hibsga olinganini e’lon qildi. 2022 yil 26 sentabrda u 6 yillik qamoq jazosiga hukm qilindi.