Qoʻshimcha funksionallar
-
Tungi ko‘rinish
AQSh va Isroil Eron hujumiga javobni muhokama qilmoqda
Vashington Isroil bilan Eronning yirik raketa hujumiga ehtimoliy javob choralarini muhokama qilmoqda, dedi Jo Bayden. BMT Xavfsizlik Kengashi favqulodda yig‘ilish o‘tkazadi.
Foto: Ammar Awad/REUTERS
Oq uy Isroil bilan Eronning avvalroq Isroil hududiga bergan yirik raketa zarbasiga javob choralari haqida muzokaralar olib bormoqda. Bu haqda 1 oktyabr, seshanba kuni AQSh prezidenti Jo Bayden jurnalistlarga ma’lum qildi. U Eron hujumi paytida uning jamoasi isroillik hamkasblari bilan aloqada bo‘lganini ta’kidladi va shuningdek, tez orada bosh vazir Binyamin Netanyahu bilan Isroilning kerakli javobini muhokama qilishini aytdi.
Baydenning ta’kidlashicha, Eron hujumi Qo‘shma Shtatlar va Isroilning harbiy salohiyati tufayli «to‘xtatilgan». Avvalroq Isroil Mudofaa kuchlari (TsAHAL) matbuot kotibi Daniel Hagariy Eron tomonidan otilgan raketalarning aksariyati Isroil, AQSh va nomi oshkor etilmagan boshqa ittifoqchilar tomonidan urib tushirilganini da’vo qilgan edi.
Harris: Eron - Yaqin Sharqdagi «beqarorlashtiruvchi kuch»
Bir kun avval AQSh vitse-prezidenti va Demokratik partiyadan prezidentlikka nomzod Kamala Harris Eronning «o‘ylamasdan qilingan va shafqatsiz» hujumini qoralab, davlatni Yaqin Sharqdagi «xavfli va beqarorlashtiruvchi kuch» deb atadi. «Isroilning Eron va Eron tomonidan qo‘llab-quvvatlanayotgan terrorchi guruhlarga qarshi o‘zini himoya qila olishini doim ta’minlayman. Isroil xavfsizligiga sodiqman», — dedi Harris.
BMT Xavfsizlik Kengashi favqulodda yig‘ilish o‘tkazadi
Eronning Isroilga hujumi ortidan BMT Xavfsizlik Kengashi Nyu-Yorkda Yaqin Sharq bo‘yicha favqulodda yig‘ilish o‘tkazadi. U 2 oktyabr kuni bo‘lib o‘tadi, deya xabar beradi Shveytsariya missiyasi.
Eron Isroilga raketalar bilan hujum qildi
Eron 1 oktyabr oqshomida Isroilga qarata 180 dan ortiq ballistik raketa uchirdi. Eron Islom inqilobi muhofizlari korpusi Isroilga qilingan hujum «Hizbulloh» yetakchisi Hasan Nasrulloh va Hamas harakati yetakchisi Ismoil Haniyaning o‘ldirilishiga javob bo‘lganini aytdi.
TsAHAL matbuot kotibi Daniel Hagariyning ta’kidlashicha, Eron raketalarni otish orqali Isroilning minglab tinch aholisini «o‘ldirish» niyatida. Bosh vazir Binyamin Netanyahu Eron «katta xatoga yo‘l qo‘ydi va buning uchun tovon to‘laydi» dedi.
