O‘zbekiston Pokiston dengiz portlari orqali yangi bozorlarga kirish imkonini o‘rganmoqda

Suhbat chog‘ida mintaqaviy o‘zaro bog‘liqlik tashabbusi doirasidagi loyihalar, jumladan Transafg‘on temiryo‘li loyihasini qurish bo‘yicha ishlarning joriy holati va istiqbollari muhokama qilindi.

"O‘zbekiston va Pokiston o‘rtasidagi oliy darajali uchrashuvlar doirasida mamlakatingiz rahbariyati bilan bir necha bor uchrashganmiz. O‘zbekiston yetakchisining mintaqaviy bog‘liqlik tashabbusi va uning doirasida qurilishi ishlab chiqilayotgan Transafg‘on temiryo‘li loyihasini to‘liq qo‘llab-quvvatlaymiz", – dedi vazir o‘rinbosari Mazhar Ali Shah.

Pokiston vakili, shuningdek, Transafg‘on temiryo‘lining qurilishi bir necha asrlarga xizmat qiluvchi, O‘zbekiston, Pokiston va Afg‘onistonning birodar xalqlari o‘rtasidagi tarixiy rishtalarni qayta bog‘lovchi muhim va strategik loyiha sifatida e’tirof etdi. Mazkur yo‘lak Pokiston mahsulotlari uchun O‘zbekiston, Markaziy Osiyo, MDH va Sharqiy Yevropa mamlakatlari bozorlariga yo‘l ochishi, O‘zbekiston ishlab chiqaruvchilariga esa Pokiston dengiz portlari orqali yangi bozorlarga kirish imkonini berishi ta’kidlandi.

Uchrashuv davomida, shuningdek, ikki mamlakat mutasaddi vazirlik va idoralari o‘rtasidagi hamkorlikning dolzarb masalalari, bo‘lajak qo‘shma tadbirlar jadvali va kun tartibi ham ko‘rib chiqildi.