Efiopiyada yo‘l-transport hodisasi oqibatida kamida 71 kishi halok bo‘ldi

Efiopiya janubidagi yo‘l-transport hodisasi oqibatida kamida 71 kishi halok bo‘ldi, deb xabar berdi mahalliy hukumatga tayanib Al-Jazeera.

Qayd qilinishicha, yo‘lovchilarni olib ketayotgan yuk mashinasi Efiopiya poytaxti Addis-Abebadan 300 km janubda joylashgan Sidama shtatida daryoga qulab tushgan.

Sidama politsiyasi bosh inspektori Daniel Sankura so‘zlariga ko‘ra, avtohalokatda 68 erkak va uch ayol nobud bo‘lgan.

Politsiya komissiyasining ma’lum qilishicha, hodisa 29 dekabr kuni sodir bo‘lgan. Odamlarni tashiyotgan yuk mashinasi ko‘prikdan o‘tib, daryoga qulagan. Ularning ko‘pchiligi to‘ydan qaytayotgan edi.

Yuk mashinasining qulab tushishiga odamlar bilan haddan ziyod to‘lgani yoki yo‘lning yomonligi sabab bo‘lishi mumkin.