Xotin-qizlar davlat xizmatining rahbarlik lavozimlariga maqsadli tayyorlanadi 

Unga ko‘ra, davlat xizmatining rahbarlik lavozimlariga xotin-qizlarni maqsadli tayyorlash tizimi yaratiladi.

Iqtidorli xotin-qizlar orasida “Rahbar ayollar maktabi”ga qabul doirasida maqsadli tanlovlar e’lon qilinib, 100 nafar xotin-qizlarning maxsus o‘quv dasturi asosida boshqaruvga oid ko‘nikmalari oshiriladi.

Onlayn o‘quvlar orqali 20 ming nafardan ortiq xotin-qizlarning bilimlari va kasbiy ko‘nikmalari oshiriladi.

Respublika va mahalliy ijro etuvchi hokimiyati organlari, davlat ulushi mavjud tijorat banklari va xo‘jalik birlashmalarining rahbarlik lavozimlari uchun kompetensiya modeli hamda professional kompetensiyalarini baholash tizimi joriy etiladi.

Yuqori, o‘rta va quyi bo‘g‘in rahbarlarining namunaviy professional kompetensiyalari ishlab chiqiladi va amaliyotga joriy etiladi.

Davlat xizmatini rivojlantirish agentligi qoshidagi Rahbar kadrlarni baholash markazida respublika va mahalliy ijro etuvchi hokimiyati organlari, davlat ulushi mavjud tijorat banklari va xo‘jalik birlashmalarining rahbarlik lavozimlaridagi shaxslar, shu jumladan zaxiradagilarning professional kompetensiyalari bosqichma-bosqich baholashdan (diagnostikadan) o‘tkaziladi.

Diagnostika natijalariga ko‘ra xodimlarning kasbiy rivojlanish rejalari ishlab chiqiladi va amalga oshirish tizimi yo‘lga qo‘yiladi.