Ukraina dronlari Kubandagi neftni qayta ishlash zavodiga hujum qildi

5 fevralga o‘tar kechasi Ukraina Qurolli kuchlari uchuvchisiz uchoqlari Azov dengizi sohilidan 40 km uzoqlikda joylashgan «Albashneft» neftni qayta ishlash zavodiga hujum qildi. Kamida bitta yoqilg‘i rezervuari yonib ketdi.

Foto: Ijtimoiy tarmoqlar

Ukraina uchuvchisiz uchoqlari 5 fevral, chorshanbaga o‘tar kechasi Krasnodar o‘lkasining Novominskaya stanitsasidagi neftni qayta ishlash zavodiga hujum qildi. Bu haqda mintaqa gubernatori Veniamin Kondratev o‘zining Telegram-kanalida ma’lum qildi. «UUA bo‘laklari neft mahsulotlarining mayda qoldiqlari bo‘lgan rezervuar ustiga tushdi. Yong‘in boshlandi», deb yozadi rasmiy va «yong‘in nazoratga olingani»ni ta’kidladi.

Novominskaya stanitsasida yagona neftni qayta ishlash zavodi — «Albashneft» OAJ joylashgan. U 2010 yilda ochilgan bo‘lib, zavod yiliga 320 ming tonnagacha neft mahsulotlarini ishlab chiqaradi. Neftni qayta ishlash zavodida sig‘imi 9 dan 10,3 ming kub metrgacha bo‘lgan sakkizta rezervuar mavjud.

Dronlar kamida 230 km masofani bosib o‘tgan

Korxona Rostov-Don shahridan 115 km janubda va Azov dengizi sohilidan 40 km uzoqlikda joylashgan. U yerdan Ukraina Qurolli kuchlari nazorati ostidagi hududgacha bo‘lgan masofa 230 kmdan ortiq.

Astra Telegram-kanali korxonadagi yong‘in tasvirini e’lon qildi. Videoga ko‘ra, kamida bitta yoqilg‘i rezervuari butunlay alanga ichida qolgan. Mahalliy aholining aytishicha, Toshkent vaqti bilan soat 08:15 da yong‘in hali o‘chirilmagan.