Shavkat Mirziyoyev Rossiya delegatsiyasini qabul qildi

Shavkat Mirziyoyev 11 fevral kuni Rossiya Federatsiyasi prezidenti administratsiyasi rahbari o‘rinbosari Maksim Oreshkin boshchiligidagi delegatsiyani qabul qildi.

Prezident matbuot xizmati ma’lum qilishicha, uchrashuv avvalida Maksim Oreshkin O‘zbekiston prezidentiga Vladimir Putinning salomi va eng ezgu tilaklarini yetkazgan.

Qayd etilishicha, uchrashuv davomida o‘tgan yil may oyida O‘zbekistonga amalga oshirilgan davlat tashrifi va boshqa oliy darajadagi muloqotlar davomida erishilgan kelishuvlarni tasdiqlangan «yo‘l xaritasi»ga muvofiq amalga oshirish masalalari ko‘rib chiqilgan.

«Savdo-iqtisodiy hamkorlikning rivojlanish sur’atini saqlab qolish, sanoat kooperatsiyasi va elektron tijorat loyihalarini qo‘llab-quvvatlash, suv xo‘jaligi, oliy ta’lim va muhandis kadrlar tayyorlash, sun’iy intellekt, madaniy almashinuv va sport sohalarida amaliy hamkorlikni kengaytirish bo‘yicha kompleks choralar ko‘rishga alohida e’tibor qaratildi», — deyiladi xabarda.