AESda ishlab chiqariladigan elektr energiyasining narxi qancha bo‘ladi?

“O‘zatom” direktori Azim Ahmadxo‘jayev Alter Ego loyihasiga bergan intervyusida Jizzaxda qurilajak kam quvvatli AESda ishlab chiqariladigan 1 kVt/soat elektr energiyasi narxi haqidagi savolga javob berdi.

“AESda ishlab chiqarilgan elektr energiyasining narxi dunyodagi eng arzonlaridan biri bo‘ladi”, – dedi u.

Ahmadxo‘jayevning qo‘shimcha qilishicha, aniq narx yakuniy xarajatlar optimallashtirilishi va texnik-iqtisodiy asos ishlab chiqilgandan so‘ng ma’lum bo‘ladi. Jahon tajribasidan kelib chiqiladigan bo‘lsa, loyihaning o‘zini oqlash muddati 15−20 yilni tashkil etishi mumkin.

“Stansiya – asosiy uskunalar va uzellarni almashtirmasdan 60 yilgacha ishlaydigan energiya manbaidir. Shundan so‘ng modernizatsiya va qo‘shimcha jihozlash ishlari olib boriladi. Keyin ham stansiya yana 20 yil ishlashi mumkin. Investitsiyalarni qaytarish muddati har qanday holatda ham stansiyadan foydalanish muddatidan bir necha baravar kam bo‘ladi. AES o‘zini qoplash nuqtasiga chiqqandan so‘ng, 1 kVt/soat elektr energiyasining narxi 1,5−2 sentni tashkil etishi mumkin”, dedi “O‘zatom” rahbari.

Uning so‘zlariga ko‘ra, AESning yakuniy qiymati hozircha noma’lum, lekin umumiy xarajatlar 2 mlrd dollardan oshmaydi. Stansiya asosan tashqi qarzlar hisobiga quriladi, davlat budjetidan minimal darajada foydalanish rejalashtirilgan.