Brent nefti narxi 2021 yildan beri eng past darajaga tushdi

AQSh prezidenti Donald Tramp tomonidan kiritilgan keng qamrovli import bojlari va Xitoyning javob choralari fonida Brent markali neft narxi 2021 yildan beri eng past darajaga tushdi. Londonning ICE Futures birjasida 4 aprel, juma kuni Brent markasidagi neftning iyun fyucherslari narxi 8,02 foizga tushib ketdi va bir barrel uchun kamida 64,35 dollarni tashkil qildi. Oxirgi marta neft 3,5 yil avval — 2021 yilning 23 avgustida 65 dollardan arzonroq bo‘lgan edi. 

So‘nggi ikki savdo sessiyasida neft narxi 13,59 foizga arzonlashgan. Bu pasayish Tramp 2 aprel kuni 183 mamlakat tovarlariga yangi tariflarni e’lon qilganidan keyin boshlandi. Ular turli mamlakatlar uchun 10 foizdan 50 foizgacha bo‘ladi. Tramp ko‘rilayotgan chora-tadbirlarni so‘nggi yillarda «yaqin va uzoq davlatlar, do‘stlar va dushmanlar tomonidan talon-toroj qilingan, zo‘rlangan va o‘g‘irlangan» AQSh iqtisodiyotini tiklash zarurati bilan izohladi.

Neft bozorining pasayishiga OPEK+'ning may oyida xomashyo qazib olishni oldindan rejalashtirilgan 135 ming barrel o‘rniga kuniga 411 ming barrelga oshirish rejalari ham ta’sir ko‘rsatdi. 4 aprel kuni Xitoy Qo‘shma Shtatlardan keladigan barcha mahsulotlarga 34 foizlik javob tariflarini joriy qilishi haqidagi xabar neft narxi pasayishini tezlashtirdi. Ushbu chora-tadbirlar 10 apreldan kuchga kiradi.