Rossiyada ota-ona qaramog‘isiz qolgan 16 nafar bola O‘zbekistonga qaytarildi

Bolalar vaqtincha Toshkent shahar IIBB qoshidagi Voyaga yetmaganlarga ijtimoiy-huquqiy yordam ko‘rsatish markaziga joylashtirildi.

Rossiyaning Sankt-Peterburg shahridan 16 nafar bola O‘zbekiston Ichki ishlar vazirligi va Sog‘liqni saqlash vazirligi xodimlari hamrohligida vatanga qaytarildi. Bu haqda Ijtimoiy himoya milliy agentligi xabar berdi.

Qayd qilinishicha, Sankt-Peterburg va Moskvadagi O‘zbekiston konsullik idoralari bolalarni davlat fuqarosi sifatida identifikatsiya qilish va ularga qaytish sertifikatlarini rasmiylashtirish bo‘yicha barcha choralarni ko‘rgan.

Hozir bolalar vaqtincha Toshkent shahar IIBB qoshidagi Voyaga yetmaganlarga ijtimoiy-huquqiy yordam ko‘rsatish markaziga joylashtirilgan.

Markazda ularni ota-onalari va yaqin qarindoshlari «Inson» ijtimoiy xizmatlar markazlari tomonidan oldindan tayyorlangan vasiylik hujjatlari bilan kutib oldi. Voyaga yetmaganlarga ijtimoiy yordam ularning keyingi yashash joylarida ham davom ettiriladi.

Ta’kidlanishicha, bolalarning 11 nafari ota-onalariga, qolganlari esa vasiylik asosida qarindoshlariga topshiriladi.