Minglab isroilliklar hukumatga qarshi namoyishga chiqdi

Isroilda 7 aprel, dushanba kuni yana minglab odamlar Tel-Aviv markazida namoyish o‘tkazish uchun ko‘chalarga chiqdi. Namoyishchilar hukumatdan G‘azo sektorida 2023 yil 7 oktyabrda garovga olingan qolgan isroilliklarni ozod qilish uchun Hamas harakati bilan kelishuvga erishishni talab qildi.

Namoyishchilarning ko‘pchiligi G‘azo sektorida urushni davom ettirishga qarshi chiqdi. Ularning plakatlariga yozilgan shiorlar orasida: «Qancha qon to‘kiladi?» yoki «Urushni to‘xtating» kabilar bor.

Namoyish Isroil bosh vaziri Binyamin Netanyahuning Vashingtonga tashrifi chog‘ida bo‘lib o‘tgani sababli, uning ishtirokchilari, jumladan, yaqinda Hamas jangchilari tomonidan ozod etilgan garovga olinganlarning bir qismi, shuningdek, ularning oila a’zolari va tarafdorlari AQSh prezidenti Donald Trampni urushni tugatishga yordam berishga chaqirdi, deb xabar qiladi AP.

Bundan tashqari, namoyishchilar Binyamin Netanyahu hukumatiga, xususan, Isroil Xavfsizlik xizmati (ShABAK) rahbari Ronen Barni ishdan bo‘shatish qaroriga qarshi o‘z noroziliklarini bildirdi. Maxsus xizmat, boshqa narsalar qatori, Netanyahuning ishonchli shaxslari va Qatar o‘rtasidagi noqonuniy aloqalarni ham tekshirmoqda. Oliy sud (Oliy adliya sudi, BAGATs) Barni ishdan bo‘shatishga vaqtinchalik taqiq qo‘ydi, sud majlisi 8 aprelga belgilangan.

18 mart kuni Isroil G‘azo sektoriga havo hujumlarini qayta boshladi. 19 mart kuni quruqlikdagi operatsiya ham qayta tiklandi. Uning maqsadi, hukumat ma’lum qilishicha, garovdagilarni ozod qilish uchun Hamasga bosimni kuchaytirish.