Ifo bosh direktori yangi global iqtisodiy inqirozni istisno etmadi

Myunxen Iqtisodiy tadqiqotlar instituti (ifo) proteksionizm kuchayib borayotgan bir sharoitda yangi global iqtisodiy inqiroz yuzaga kelishi ehtimoli haqida ogohlantirdi. «Afsuski, buni inkor etib bo‘lmaydi», dedi ifo bosh direktori Klemens Fyust 11 aprel, juma kuni chop etilgan Süddeutsche Zeitung gazetasiga bergan intervyusida.

Uning so‘zlariga ko‘ra, Qo‘shma Shtatlar o‘z o‘zidan jahon iqtisodiyotini inqirozga solib qo‘ymaydi. «Agar proteksionizm Xitoyda ham, Yevropada ham tezroq tarqalsa, bu katta xavf tug‘diradi. Agar hamma noto‘g‘ri yo‘ldan ketsa, bu jiddiy inqirozga olib kelishi mumkin», dedi u.

Shu bilan birga, Fyustning ta’kidlashicha, amerikaliklar hozirda ishonchli hamkor sifatidagi obro‘sini yo‘q qilmoqda. «Bu xavfli, chunki AQSh hali ham dunyodagi eng muhim iqtisodiy kuchdir», dedi ifo rahbari.

Hozir sodir bo‘layotgan narsa butun dunyo uchun «xavotirli qo‘ng‘iroq», deya qo‘shimcha qildi u. «Dunyo kapitallashuvining uchdan ikki qismi Amerika fond bozoriga to‘g‘ri keladi, dollar esa dunyoning zaxira valutasi hisoblanadi. Agar bularning barchasi qulab tushsa, oldindan aytib bo‘lmaydigan oqibatlar bo‘ladi», — deya ogohlantirdi Fyust.