Kongressmen AQShni Falastindagi «genotsidga sheriklikda» aybladi

AQSh Vakillar palatasining Demokratik partiyadan a’zosi Rashida Tlaib Qo‘shma Shtatlarni «genotsid»ga sheriklikda aybladi.

X ijtimoiy tarmog‘ida chop etilgan bayonotida Tlaib Isroil hukumatining qaroriga keskin munosabat bildirdi.

«Isroil 64 kundan beri insonparvarlik yordamining G‘azoga kirishiga to‘sqinlik qilmoqda. Urush jinoyatchisi Binyamin Netanyaxu butun Falastin aholisini majburan chiqarib yuborish, etnik tozalash, G‘azoni butunlay vayron qilish va uni anneksiya qilishni nazarda tutuvchi rejani oshkor qildi», — deb yozadi u.

Tlaibning so‘zlariga ko‘ra, Isroil boshidanoq bu yo‘lni tanlagan.

«Qo‘shma Shtatlar bu genotsidning sherigi», deb ta’kidladi siyosatchi.

Avvalroq Isroil harbiy-siyosiy vazirlar mahkamasi G‘azo sektoridagi «hududlarni to‘liq bosib olish» va ular ustidan «barqaror nazorat» o‘rnatishni nazarda tutuvchi “Hamas tashkilotini yo‘q qilish» bo‘yicha operativ rejani tasdiqladi. Bu haqda Isroil bosh vaziri devonining maslahatchisi Dmitriy Gendelman ma’lum qildi.

Hukumat rahbarining ta’kidlashicha, avvalgi operatsiyalardan farqli o‘laroq, gap maqsadli reydlar haqida emas, balki «hududlarni to‘liq bosib olish va ular ustidan barqaror nazorat o‘rnatish haqida». Rejaga G‘azodagi hududlarni qo‘lga olish va ushlab turish; tinch aholining xavfsizligi uchun janubga ko‘chirish; Hamasni insonparvarlik yordamidan mahrum qilish; ularning infratuzilmasi va qo‘mondonlik punktlariga ommaviy zarbalar berish kiritilgan.