Rossiyada ota-ona qaramog‘isiz qolgan bola O‘zbekistonga qaytarildi

Ijtimoiy himoya milliy agentligi xabariga ko‘ra, samolyot bortida Rossiya Ichki ishlar vazirligi xodimlari hamrohligida, ota-ona qaramog‘isiz qolgan, voyaga yetmagan O‘zbekiston fuqarosi olib kelindi.

Voyaga yetmagan bola Toshkent shahar Ichki ishlar bosh boshqarmasi huzuridagi Voyaga yetmaganlarga ijtimoiy-huquqiy yordam ko‘rsatish markaziga vaqtincha joylashtirildi.

Bolani “Inson” ijtimoiy xizmatlar markazi ko‘magida oldindan tayyorlangan ota tarafdagi oilasi kutib oldi. Voyaga yetmagan fuqaro uchun ijtimoiy qo‘llab-quvvatlash ishlari uning doimiy yashash joyida davom ettiriladi.

O‘zbekiston Ichki ishlar vazirligi, Tashqi ishlar vazirligi va prezident huzuridagi Ijtimoiy himoya milliy agentligining samarali hamkorligi natijasida 2025 yil 13 may holatiga qadar jami 54 nafar voyaga yetmagan fuqaro vatanga qaytarildi.