Bloger Qobil Do‘sov ustidan yana bir sud ishi bo‘lib o‘tmoqda

Bloger Qobil Do‘sov ustidan yana bir sud ishi bo‘lib o‘tmoqda. Bu haqda sud majlislari onlayn jadvalida keltirilgan.

Unga ko‘ra, sud ishi JIB Shayxontohur tuman sudida sudya Tolibjon Obidov raisligida ko‘rib chiqilmoqda. Sobiq deputat Jinoyat kodeksining 139-moddasi (Tuhmat) 3-qismi “a” bandi, 140-moddasi (Haqorat qilish) 3-qismi “a” bandi, 237-moddasi (Yolg‘on xabar berish) 2-qismi “g” bandi bilan ayblanmoqda. 

Sud ishida 5 kishi jabrlanuvchi bo‘lib o‘tgan. Ularning aksariyati ta’lim tizimi vakillari. Jumladan, jabrlanuvchilar orasida Navoiy viloyati Maktabgacha va maktab ta’limi boshqarmasi boshlig‘i Ra’no Hayitova ham bor.

Kecha, 20 may kuni ushbu jinoyat ishi bo‘yicha sud majlisi o‘tkazilgan. Ijtimoiy tarmoqlarda sudda prokuror Qobil Do‘sovga 6 yil ozodlikdan mahrum qilish jazosi so‘ragani haqidagi xabarlar tarqaldi.

Qobil Do‘sov avvalroq Maktabgacha va maktab ta’limi vaziri o‘rinbosari Farhod Boqiyevni haqorat qilganlikda aybli deb topilib, 1 yilga ozodlikni cheklash jazosiga hukm qilingandi. Oradan ko‘p o‘tmay u ozodlikni cheklash shartlarini buzgani uchun koloniyaga o‘tkazildi. 2025 yil fevral oyi oxiriga kelib sobiq deputat Jizzax viloyati Maktabgacha va maktab ta’limi boshqarmasi tizimi mas’ullarini haqorat va ularga tuhmat qilishga oid jinoyat ishida ham aybli deb topildi. Bu “delo” bo‘yicha unga sud hukmi bilan 1 yil 2 oy muddatga ozodlikdan mahrum etish jazosi tayinlangandi.