Pentagon: Mo‘sulga hujum qilish jadvalidan o‘zib ketildi

Iroq hukumat qo‘shinlari va kurd ko‘ngilli bo‘linmalari Mo‘sulni IShID jangarilaridan ozod qilish bo‘yicha muvaffaqiyatli yurishini davom ettirmoqda, deb xabar qilgan Pentagon ma'muriyati.

"Ilk ma'lumotlarga binoan, Iroq kuchlari oldilariga qo‘yilgan vazifani uddalashgan hamda belgilangan muddatdan o‘zib ketishdi", - degan Amerika mudofaa vazirligi matbuot kotibi Piter Kuk.

Mo‘sul shahriga hujum 17 oktabrda boshlangani haqida Iroq bosh vaziri Haydar Al Obodiy bayonot bergan edi. Unda hukumat hamda kurd ko‘ngilli bo‘linmalaridan iborat 30 mingga yaqin harbiy ishtirok etmoqda. Jangovar amaliyot IShIDga qarshi xalqaro koalitsiya kuchlarining havo va quruqlikdagi ko‘magida amalga oshirilmoqda. 

Iroq Kurdistoni prezidenti Ma'sud Barzaniyning aytishicha, kurd harbiylari birinchi kunda 200 kv.km. maydondagi 9ta qishloq tozalangan. 

Bundan tashqari, kurd jangchilari Arbil va Mo‘sul shaharlarini bog‘lovchi yo‘lning asosiy qismini egallagan. 

Shunga qaramay, Pentagon vakili "mazkur harbiy kampaniya mashaqqatli bo‘lishi va ma'lum bir vaqtni olishidan" ogohlantirgan.