Tailandda ko‘ngilochar dasturlar namoyishi qayta tiklanadi

Tailand vazirlar mahkamasi seshanba kuni 14 noyabrdan, ya'ni qirol Pxumipxon Adul'yadet o‘limidan bir oy o‘tgach, ko‘ngilochar teledasturlar namoyishini qayta tiklashga ruxsat berish haqida qaror qabul qildi. Bu haqida jurnalistlarga mamlakat bosh vaziri general Prayut Chan-Ocha xabar berdi, qisqa intervyu Tailandning Uchinchi milliy kanali orqali namoyish etildi. 

"Shunga qaramay, telekanallar mamlakat motamda ekanligini unutmasliklari kerak. Ko‘rsatuvlarda vazmin ohangni saqlab turish lozim, bu ayniqsa hajviy  ko‘rsatuvlarga taalluqli", - qo‘shimcha qildi hukumat rahbari. 

Tailandda 13 oktabrda hayotdan ko‘z yumgan qirol o‘limi munosabati bilan bir yillik motam e'lon qilingan. Qirol o‘limidan so‘ng hukumat televideniye orqali bir oy davomida ko‘ngilochar dasturlar namoyishini taqiqlab qo‘ygandi. Shuningdek, hukumat mamlakat fuqarolari va barcha tashkilotlardan bu davr ichida bo‘lib o‘tishi rejalashtirilgan tadbirlarni bekor qilishni so‘ragandi.