Suriyada Amerikaning ilk askari qurbon bo‘ldi

AQSh mudofaa vazirligi tomonidan tashkil etilgan «Tebranmas qat'iyat» harbiy amaliyoti saytida 2015 yili Suriyaga yuborilgan amerikalik askarlardan birining vafot etgani xabar qilindi. 

Shundan so‘ng, marhum harbiy xizmatchining oila a'zolariga harbiy amaliyot komandiri Stefen Taunsend va Pentagon rasmiy vakili Esh Karter hamdardlik bildirgan. 

Ismi oshkor qilinmayotgan askar Raqqa shahridan 50 km uzoqlikdagi Ayn-Issa shahrida halok bo‘lgan. Ushbu shahar IShID terrorchilik guruhining ma'muriy markazi hisoblanadi. Pentagon bayonotiga ko‘ra, uning o‘limiga qo‘lbola bombaning portlashi sabab bo‘lgan. 

Rossiya mudofaa vazirligi tomonidan 2015 yil sentabr oyi oxirlarida boshlangan Suriyadagi harbiy amaliyotlari chog‘ida, rasmiy ma'lumotlarga ko‘ra, 19 nafar harbiy xizmatchi hayotidan mahrum bo‘lgan.