O‘zbekistonlik texnik xodimlar Yaponiyaning yetakchi kompaniyalarida malaka oshiradigan bo‘ldi

2017 yil 16 fevral kuni O‘zbekiston Respublikasi Mehnat vazirligida 14 nafar texnik xodimga Yaponiyada malaka oshirish uchun ruxsatnomalarni tantanali topshirish marosimi bo‘lib o‘tdi.

Tadbirda O‘zbekiston Respublikasi Mehnat vaziri A.Abduhakimov,  Yaponiyaning O‘zbekistondagi elchixonasi vakillari, Tashqi mehnat migratsiyasi masalalari agentligining mas'ul vakillari, mamlakatimizning nufuzli idoralari va ommaviy axborot vositalari xodimlari  ishtirok etdi.

Yaponiyada texnik malaka oshirish imkoniyatini qo‘lga kiritgan yurtdoshlarimiz kunchiqar mamlakatning iqtisodiyotiga hissa qo‘shishi bilan bir qatorda, ona yurtimizga yangi texnologiyalarga oid bilim va ko‘nikmalar, sarmoyalar bilan qaytishga muvaffaq bo‘lishadi. 

O‘zbekiston Respublikasi Mehnat vazirligi va Yaponiya davlati elchixonasi o‘rtasidagi hamkorlik rishtalari ko‘pgina loyihalarni amalga oshirish imkonini berdi.

Tashqi mehnat migratsiyasi masalalari agentligi tomonidan o‘zbek fuqarolarini Yaponiyada mehnat faoliyatini yuritishi sohasida hamkorlik qilish uchun faol ish olib borildi. Natijada, dastlabki qadam sifatida 2016 yilning 14 mayida agentlik va “Uno” korporatsiyasi o‘rtasida hamkorlik to‘g‘risida qaydnoma imzolandi.

Muzokaralar natijasida Yaponiyaning  GRANATJapanCo. Ltd, MarukoFoodCo. Ltd, IIDASangyoCo. Ltd, SAIKONTAN Farm, EastSunCo. Ltd va  TakeruCo. Ltd kabi taniqli kompaniyalarida ishlash uchun o‘zbekistonlik stajyorlar tanlab olindi. 

Bundan tashqari, O‘zbekiston Respublikasi Mehnat vaziri boshchiligidagi delegatsiya 2016 yil 6-15 may kunlari Yaponiyaning Mehnat vazirligi, vakolatli organlari  Savdo-sanoat palatasi, Immigratsiya xizmati, JITKO, JYeTRO va JIKA kompaniyalari bilan o‘zbek ishchilariga kvotalar ajratish borasida muzokaralar olib bordi.