Apple’ning yangi zavodi Hindistonda paydo bo‘ladi

Apple kompaniyasi Hindistondagi ilk zavodini yaqin besh-olti hafta ichida ochadi. Bu haqda kompaniyadagi manbaga asoslangan holda The Wall Street Journal xabar bermoqda. 

Zavod mamlakatning Bangalor shahrida qad ko‘taradi. Kompaniyaning o‘zidagilar bu yangilikning batafsil ma'lumoti bilan o‘rtoqlashishni istashmadi, biroq shuni ta'kidlashdiki, bu masaladagi muzokaralar hind hukumati bilan ochiq ruhda o‘tkazilgan.

Tahlilchilarning aytishicha, kompaniyaning Hindistonda paydo bo‘luvchi zavodi taraqqiy etayotgan bozorda uning imkoniyatlarini yanada oshiradi. Bundan tashqari, ushbu mamlakatda ishlab chiqarilayotgan qurilmalar ancha arzonlashadi. Ayrim ma'lumotlarga ko‘ra, qurilmalarning qiymati 100 dollargacha tushish ehtimoli bor.

Apple Hindistonda o‘z zavodini ochish rejasi borligi haqida ilk marta joriy yilning fevralida ma'lum qilgan edi.