Namangan va Sverdlovsk kardiologlari tajriba almashadi

Avval xabar berganimizdek, Rossiyaning Sverdlovsk viloyatiga  28 mart kuni Namangan viloyati delegatsiyasi tashrif buyurdi. Uning davomida qator sohalarda hamkorlik masalalari yuzasidan tajriba almashilmoqda. Buni Rossiya federatsiyasida muhim o‘rin tutgan Ural kardiologiya institutidagi muzokaralardan yaqqol bilish  mumkin.

Institut direktori Yan Gabinskiy shunday dedi: «Sverdlovsk viloyati kardiologiyasi juda tez rivojlanmoqda. Bugun biz O‘zbekistonlik hamkasblarimizga angiografning yangi avlod uskunalarini ko‘rsatdik. Bemorlarga  chidamli stentlar qo‘yish orqali koronar qon tomirlar miqdori jihatidan Rossiya federatsiyasida eng katta ko‘rsatkichga egamiz».

- Bunday tajribalarni o‘z yurtimizda biz ham yanada kengaytirishimiz kerak. Buning uchun  mutaxassislarimizni bu yerga yuborish orqali tajribalar almashamiz. Sverlovsk viloyati mutaxassislarini esa birga ishlashga chorlaymiz, - dedi Namangan viloyati sog‘liqni saqlash boshqarmasi boshlig‘i Solijon Mo‘minov.

Shuningdek, ikki tomon rasmiy vakillari ishtirokida sohalar rivoji yuzasidan muzokaralar ham tashkil etildi.

Hojiakbar Pattayev