iPhone 8'ga aksessuarlarni ulash imkonini beruvchi konnektor o‘rnatiladi

Apple korporatsiyasi yangi iPhone'ga  smartfonga turli aksessuarlarni ulash imkonini beruvchi Smart Connector'ni  o‘rnatadi. Bu haqida The Verifier portalida xabar berildi. 

Manbaga ko‘ra, Smart Connector orqali virtual yoki to‘ldirilgan reallik ko‘zoynaklari, quloqchinlar va boshqa gadjyetlarni ulash mumkin. Bundan tashqari, konnektor simsiz quvvat olish uchun ham qo‘llanishi kutilmoqda. 

Smart Connector birinchi marta iPad Pro'da paydo bo‘lgan va simsiz klaviatura ulash uchun kerak bo‘lgan. Apple smartfonlarida bu portning paydo bo‘lishi haqida insayderlar iPhone 7 taqdimotidan avvalroq ma'lum qilishgandi. 

Shuningdek, kompaniyaning so‘nggi patentlariga ko‘ra, iPhone 8 "suyuq metall" korpusga ega bo‘ladi. Bu material sirkoniy, titan, nikel, mis hamda boshqa metallarning o‘ziga xos qotishmasi hisoblanadi va o‘z tuzilmasiga ko‘ra, shishaga o‘xshab ketadi. U yetarlicha mustahkam va chidamlidir. Bundan tashqari, qotishma mayda "jarohatlar"ni yashirish xususiyatiga ham ega.