Yevropada A gepatitiga chalinganlar soni 674 nafarga yetdi

Yevropaning 13 mamlakatida A gepatiti avj oldi, kasallikning 674 ta holati qayd etilgan - bu bir oy avvalgiga nisbatan ikki karra ko‘p. "Rospotrebnadzor" saytida shu haqida ma'lmuot berildi. 

"Yevropa mintaqasi mamlakatlarida A gepatiti bilan kasallanganlik ko‘rsatkichlari oshib bormoqda. 2016 yilning iyunidan 2017 yilning 28 apreliga qadar A gepatitiga chalingan 674 kishi qayd qilingan, shulardan 631 holat - erkaklar orasida", - deyiladi xabarda. 

Avstriya, Belgiya, Buyuk Britaniya, Daniya, Finlyandiya, Fransiya, Germaniya, Italiya, Irlandiya, Niderlandiya, Portugaliya, Ispaniya va Shvetsiyada kasallik holatlari qayd etilgan.

"Rospotrebnadzor" Yevropa davlatlariga sayohat qilishni rejalashtirayotgan rossiyaliklarni ushbu ma'lumotni inobatga olishga chaqirdi. 

A gepatiti - iflos suv, qo‘llar va oziq-ovqat mahsulotlari orqali yuquvchi jigarning virusli kasalligi. Uning inkubatsiya davri - 7 kundan 50 kungacha, ko‘pincha u 35 kundan iborat bo‘ladi.