Yarim milliard so‘mlik dorilar xaridorlar qo‘liga yetib bormadi. Nega?

Xorazm viloyati davlat soliq boshqarmasi tomonidan huquq tartibot organlari bilan hamkorlikda fuqaro Sobir Hasanovning (ism-shariflar o‘zgartirilgan) Samarqand viloyatidan noqonuniy ravishda dori-darmon vositalarini viloyatga olib kelib, sotayotgani aniqlandi, deb yozmoqda O‘zA.

O‘rganishlar davomida C.Hasanov Urganch tumanidagi Mutavalli mahallasidagi uylarning birida noqonuniy savdo bilan shug‘ullanayotgani ma'lum bo‘ldi. Uyning uchta xonasi dori-darmon vositalarini saqlaydigan omborxonaga aylantirilgan. 

Tezkor reyd davomida ushbu xonadonda 459 turdagi qariyb 570 million so‘mlik kirim hujjati va sifat sertifikati bo‘lmagan dori-darmon vositalari mavjudligi aniqlandi. 

O‘rganishlar 14 dori vositasining yaroqlilik muddati o‘tganini ko‘rsatdi . 

Soxta tadbirkorlik yo‘lini tanlagan fuqaro o‘z faoliyati yuzasidan davlat ro‘yxatidan o‘tmasdan, davlatga soliq to‘lovlarini to‘lashdan bo‘yin tovlashga harakat qilgan hamda biror marta soliq to‘lovlarini amalga oshirmagan.