AQSh hukumati Apple’ga nisbatan surishtiruv boshladi

AQSh Adliya vazirligi hamda Qimmatli qog‘ozlar va birjalar bo‘yicha komissiyasi iPhone akkumulyatorlari bilan bog‘liq mojaroni birgalikda surishtiruvdan o‘tkazishni boshladi. Bu haqda The Verge xabar qilmoqda.

Idoralar Apple eski iPhone modellarida protsessorlar ishining atayin sekinlashishi holatini yashirib, shaxsiy ma'lumotlar to‘g‘risidagi qonunni buzganini aniqlashi kerak. Shu bilan birga, Fransiya va Italiyada ham Apple’ga nisbatan surishtiruv ishlari olib borilmoqda. Rossiyada ham kompaniyaga qarshi bir nechta da'vo arizalari bilan chiqishgan.

Avvalroq, Apple kompaniyasi ba'zi eski iPhone modellari unumdorligini ataylab pasaytirishi ma'lum bo‘lgandan keyin yuzaga kelgan “tushunmovchilik” uchun uzr so‘ragandi. Bayonotda aytilishicha, bir yil avval chiqqan iOS 10.2.1 yangilanmasi iPhone 6, iPhone 6 Plus, iPhone 6s, iPhone 6s Plus va iPhone SE smartfonlari unumdorligini ularning batareyalari uzoqroq ishlashi va smartfonlar o‘chib qolishi bilan bog‘liq muammolardan qochish uchun pasaytiradi.