Umid Ahmadjonov Andijonga tashrif buyurdi

O‘zbekiston futbol Assotsiatsiyasi 1-vitse-prezidenti Umid Ahmadjonov maxsus ishchi guruh bilan Andijonga tashrif buyurdi. Bu haqda O‘FA rasmiy sayti xabar tarqatdi.

Dastlab, Umid Ahmadjonov Andijondagi Sho‘rbuloq futbolga ixtisoslashtirilgan maktab-internatiga tashrif buyurdi. O‘FA 1-vitse-prezidenti maktab-internatidagi sharoitlar bilan yaqindan tanishdi.

Shundan so‘ng, delegatsiya «Andijanka» sport bazasiga tashrif buyurib, bu yerdagi sharoitlar bilan tanishdi. Umid Ahmadjonov «Andijanka» jamoasining stadionini rekonstruksiya qilish bo‘yicha topshiriq berdi. Shuningdek, O‘FA 1-vitse-prezidentining qaroriga ko‘ra 7 marta O‘zbekiston chempioni bo‘lgan «Andijanka» jamoasi 2018 yilgi Superliga bahslarida ishtirok etadigan bo‘ldi.

Umid Ahmadjonov shuningdek «Sog‘lom avlod stadioni»da andijonlik futbol muxlislari bilan uchrashdi.