KQTT Skripalni zaharlashda qo‘llangan modda qaysi davlatda ishlab chiqarilganini aniqlay olmadi

Buyuk Britaniyaning Kimyoviy qurolni taqiqlash bo‘yicha tashkilotdagi vakili Peter Uilsonning ma'lum qilishicha, tashkilot mutaxassislari Britaniyaning Solsberisida GRU sobiq polkovnigi Sergey Skripal va uning qizi Yuliyani zaharlashda qo‘llangan modda qaysi davlatda ishlab chiqarilganini aniqlay olmadi. Bu haqda RIA «Novosti» xabar bergan.

«Albatta, ishlatilgan asab-falajlovchi moddani aniqlash – bu bizning surishtiruvdagi texnik isbotlarning ajralmas qismi, na DSTL (Britaniya hukumatining Porton-Daundagi mudofaa va texnologiyalar ilmiy laboratoriyasi), na KQTT hisoboti ushbu hujumda qo‘llanilgan modda qaysi mamlakat yoki laboratoriyada ishlab chiqarilganini aniqlashtirmaydi», - deya aytib o‘tgan Uilson.

U bu haqda tashkilotning Haagadagi qarorgohida chiqish qilib aytib o‘tdi.

«Bizning fikrcha, faqatgina Rossiyada texnik imkoniyatlar, foydalanish tajribasi va Skripallarni nishon sifatida tanlashga sabab bor bo‘lgan», - deya ta'kidlab o‘tdi u.

Eslatib o‘tamiz, avvalroq Kanada TIV rahbari Xristya Frilend Rossiya tomoni bilan muloqot zarurligi, biroq Moskva GRU sobiq polkovnigi Sergey Skripal va uning qizi Yuliya zaharlanishi bo‘yicha ishda «qizil chiziqdan» o‘tgani haqida ma'lum qilgandi.