Forbes rossiyalik eng boy tadbirkorlarni ma'lum qildi. Usmonov va Mahmudov nechanchi o‘rinda?

Forbes jurnali rossiyalik eng boy tadbirkorlar reytingini tuzib chiqdi.

Ma'lum bo‘lishicha, reytingda qora metallurgiya, transport infratuzilmasi, logistika bilan shug‘ullanuvchi Vladimir Lisin yetakchilik qilmoqda. Uning boyligi 19,1 mlrd dollarga baholandi.

Ikkinchi o‘rindan qora metallurgiya, rangli metallurgiya, turizm, mashinasozlik bilan shug‘ullanuvchi Aleksey Mordashov joy oldi, u o‘z faoliyati davomida jami 18,7 mlrd dollar ishlab topgan.

Uchinchi o‘rinni gaz, neftekimyoga asosiy e'tiborini qaratuvchi Leonid Mixelson 18 mlrd dollar bilan egalladi.

Kuchli beshlikdan Vagit Alekperov ($16,4 mlrd) va Gennadiy Timchenko ($16 mlrd) ham joy oldi.

Asli kelib chiqishi o‘zbekistonlik bo‘lgan rossiyalik tadbirkor Alisher Usmonov yangi reytingda 10-o‘ringa munosib ko‘rildi. U qora metallurgiya, telekommunikatsiyalar, internet bilan shug‘ullanishi aytilgan. Usmonovning boyligi 12,5 mlrd dollarga baholandi. 

Shuningdek, Iskandar Mahmudov reytingning 16-o‘rnida joylashdi. Rangli metallurgiya, mashinasozlik, ko‘mir bilan shug‘ullanuvchi Mahmudov 7,3 mlrd dollarga ega.

Bundan tashqari, “Telegram” asoschisi Pavel Durov reytingning 58-pog‘onasida joylashdi. U 1,7 mlrd dollarga egaligi aytilmoqda.