Sardor Rahimxon, Asilbek Negmatov va yana ikki xonandaning litsenziyasi to‘xtatildi

"O‘zbekkonsert" O‘zbekistonda xizmat ko‘rsatgan artist Sardor Rahimxon, san'atkorlar Feruza Jumaniyozova, Asilbek Negmatov va Tohir Usmonovning litsenziyasini to‘xtatdi. KUN.UZ muxbiri 31 may kuni bo‘lib o‘tgan "Milliy estrada san'atining yoshlar ma'naviy, axloqiy tarbiyasidagi o‘rni va san'atkor odobi" mavzusidagi yig‘ilishida berilgan ma'lumotga asoslanib, shu haqida xabar berdi. 

Tadbir jarayonida ma'lum bo‘lishicha, "O‘zbekkonsert" tomonidan taklif qilingan 85 nafar xonandadan  bir nechasi kelmagan. "O‘zbekkonsert" rahbari Odiljon Abduqahhorov O‘zbekistonda xizmat ko‘rsatgan artist Sardor Rahimxon, san'atkorlar Feruza Jumaniyozova, Asilbek Negmatov va Tohir Usmonovlarning tadbirga kelmaganini hurmatsizlik deya baholab, ularni litsenziyadan mahrum qilish to‘g‘risidagi buyruqni tayyorlashni topshirdi va yig‘ilish so‘nggida uni o‘qib eshittirdi.