Yaponiyadagi tabiiy ofat qurbonlari soni 27 nafarga yetdi, yana 47 kishi bedarak yo‘qolgan

Yaponiyada kuchli yomg‘irlar sabab yuzaga kelgan suv toshqinlari 27 kishini hayotdan olib ketdi, 47 kishi bedarak yo‘qoldi. Bu haqda NHK telekompaniyasiga asoslanib, Reuters xabar bermoqda.

Mamlakatning ayniqsa g‘arbiy va markaziy qismlarini qamrab olgan tabiiy ofat tufayli 1,6 milliondan ziyod aholi o‘z uylaridan xavfsiz hududlarga evakuatsiya qilingan.

Yaponiya Meteorologiya agentligi mamlakatning asosiy qismini tashkil etuvchi Honshu oroli g‘arbida yashovchi aholini hushyorlikka chaqirib, ushbu favqulodda surunkali yomg‘irlarni «tarixiy yog‘ingarchilik davri» deb atagan.

Hukumat rasmiysi Yoshihide Suga bergan ma'lumotga ko‘ra, politsiya, o‘t o‘chirish xizmatlari va mamlakat mudofaa kuchlaridan 48 ming nafarga yaqin xodim toshqinlar va ko‘chkilar sabab xavf ostida qolayotgan aholi yashash punktlarida qutqaruv safarbarligiga jalb etilgan.

Daryolarning o‘zanidan chiqishi oqibatida mamlakat kommunikatsion tizimlarida uzilishlar kuzatilmoqda. Xususan, Kyushu oroli shimolida ko‘chkilar sabab temiryo‘llarni tuproq qoplagan.