Isroil Madrimov mutlaq g‘alabaga erishdi. O‘zbekistonlik bokschilarning barchasi yarim finalda

Osiyo o‘yinlarida O‘zbekiston delegatsiyasi bayroqdori Isroil Madrimov ham turnirning yarim finaliga yo‘l oldi.

-74 kg vazn toifasida chorak finalda eronlik Sayidshahin Musaviyga qarshi ringga ko‘tarilgan Madrimov 5:0 (30:27, 30:27, 30:27, 30:27, 30:27) hisobidagi g‘alabaga erishdi.

Endi u 31 avgust kuni filippinlik Marsiyal Emir Feliksga qarshi yarim final jangini o‘tkazadi.

Shu tariqa, Osiyo o‘yinlariga yo‘l olgan o‘zbekistonlik bokschilarning barchasi yarim finalda ishtirok etadigan bo‘ldi. Bungacha Hasanboy Do‘smatov (-49 kg), Jasur Latipov (-52 kg), Miraziz Mirzahalilov (-56 kg), Shunqor Abdurasulov (-60 kg), Iqboljon Xoldorov (-64 kg) va Bobousmon Baturov (-69 kg) ham yarim final yo‘llanmasini hal qilgandi.