Afrikada muxlislar otlarning oyoqlari tagida nobud bo‘lishdi

Afrika Chempionlar Ligasi chorakfinalidan o‘rin olgan Angolaning «Primeyru di Agoshtu» va Kongoning «Mazembe» klublari o‘rtasidagi bahs fojia bilan tugadi.

15 sentabr kuni Luanda shahrida o‘tgan bellashuvda ko‘plab muxlislar stadionning yopiq darvozasi oldiga to‘planib qolishgan. Natijada tiqilinch yuzaga kelgan. Darvoza ochib yuborilgach esa tashqariga yopirilgan odamlar politsiya otlarining oyoqlari ostida qolib ketishgan.

Natijada, kamida 5 nafar odam halok bo‘lgan va 7 nafari shifoxonaga yotqizilgan. Angola sport federatsiyasi xabariga ko‘ra, jabrlanganlarga tibbiy yordam ko‘rsatilib, uyiga javob berib yuborilgan.