5 nafar venesuelalik Kolumbiyaga qochish vaqtida halok bo‘ldi

5 nafar venesuelalikning Venesueladan qo‘shni Kolumbiyaga Tachira daryosi orqali o‘tishga urinishi ularning halok bo‘lishi bilan yakunlandi.

Tachira shtati fuqarolik mudofaasi xizmatining xabar berishicha, qirg‘oqlaridan chiqqan va shiddatlashgan daryo o‘z oqimlarida qochqinlarni olib ketgan. Hozircha halok bo‘lganlardan uch nafarining jasadi topilgan.

Ma'lum qilinishicha, halok bo‘lganlardan 3 nafari Venesueladagi iqtisodiy inqiroz sababli mamlakatni tark etmoqchi bo‘lgan, qolgan 2 kishi ularga hamrohlik qilgan. 

Venesuelada ancha vaqtdan beri iqtisodiy inqiroz davom etmoqda. Xalqaro valyuta jamg‘armasi prognozlariga ko‘ra, 2018 yil oxiriga kelib mamlakatda inflyatsiya darajasi 1 million foizga yetishi mumkin. Bu esa mamlakatdagi vaziyatni Germaniyada 1923 yilda yoki Zimbabveda 2000-yillar oxirida yuzaga kelgan vaziyatga o‘xshash qiladi.