«O‘zpaxtasanoat» AJ xodimlari paxta yig‘im-terimi hasharini o‘tkazishdi

Joriy yilning 13 oktabr kuni “O‘zpaxtasanoat” aksiyadorlik jamiyatining 170 nafar xodimi boshqaruv raisi Alisher Maqsudov boshchiligida o‘z tashabbusiga ko‘ra paxta dalalariga hasharga chiqishdi. Bu haqda “O‘zpaxtasanoat” AJ Matbuot xizmati xabar bermoqda.

Dam olish kunlarida paxtakorlarga ko‘maklashishni niyat qilgan hasharchilar Sirdaryo viloyati, Sirdaryo tumani, Hamza suv iste'molchilari uyushmasi hududidagi «Xudoyqul o‘g‘li Sulaymon» fermer xo‘jaligiga yordam berishdi.

«O‘zpaxtasanoat» AJ boshqaruvi raisi A.Maqsudov hasharchilarni qo‘llab-quvvatlash maqsadida paxta dalasida terimchilar bilan uchrashib, ular uchun yaratilgan sharoitlar bilan yaqindan tanishdi va birgalikda paxta hasharida qatnashdi.

Shu kuni hasharchilar uchun tushlik dasturxoni tashkil etilib, issiq ovqatlar tortildi. Ko‘tarinki kayfiyat va bayramona ruhda o‘tgan hashar davomida tashabbuskor terimchilar tomonidan 7,5 tonna paxta hosili terib olindi.