Toshkent markazida oltita mashina ishtirokida YTH yuz berdi

Toshkentda kecha oltita avtomobil ishtirokida yo‘l-transport hodisasi yuz berdi, bir kishi jarohat oldi.

«27 noyabr kuni, taxminan soat 21:30larda, Olmazor tumanidagi Sebzor va Nurafshon ko‘chalari kesishmasida oltita mashina ishtirokida YTH sodir bo‘ldi. Avtomobillardan birining haydovchisi jarohat oldi», - deya xabar berishdi poytaxt IIBBdan.

Jabrlanuvchi kasalxonaga yotqizilgan, shifokorlar uning ahvolini qoniqarli deb baholayaptilar.

Yo‘l-transport hodisasiga aynan jarohat olgan haydovchi tomonidan yo‘l harakati qoidalari buzilishi sabab bo‘lgan: u svetoforning taqiqlovchi signalida chorrahaga chiqib ketgan. 

Eslatib o‘tamiz, avvalroq Mudofaa vazirligi Qarshidagi YTH bo‘yicha rasmiy axborot bergandi.