Trampning sobiq advokatiga uch yillik qamoq jazosi berildi

AQSh prezidenti Donald Trampning sobiq advokati Maykl Koen bir qator jinoyatlar, jumladan prezident kampaniyasi vaqtidagi moliyaviy qoidabuzarliklar va Tramp bilan jinsiy yaqinlikda bo‘lganini ta'kidlagan ikki ayolga sukut saqlash uchun pul to‘laganlik uchun 3 yillik qamoq jazosiga tortildi. Koenga, shuningdek, 2 mln dollarlik jarima solingan.  

Advokatning o‘zi avvalroq moliyaviy qoidabuzarliklar, soliq firibgarliklari sodir etish va AQSh kongressiga yolg‘on ko‘rsatmalar berishdagi aybini tan olgan.

Koen sud yig‘ilishida Tramp uni “yovuzlik yo‘lidan borishga” majbur qilganini va Trampga sodiqligi uning zaif tomoni bo‘lganini aytgan.

“Men ko‘chmas mulk kompaniyasiga ishlash taklifini olib xato qilganman. Tramp meni tvitterda “zaif” deb atadi va u haq bo‘lgan, biroq mening zaifligim qalbim amrini eshitmay, uning ishlarini yashirish majburiyatim deb o‘ylaganim bo‘lgan”, deb aytgan Koen so‘nggi so‘zida va ko‘ziga yosh olgan.

“Men AQSh xalqi oldida uzr so‘rayman – u haqiqatni bilishga loyiq”, deb qo‘shimcha qilgan Koen.