Olmaotada vertolyot sihatgoh hududiga quladi 

Olmaotada vertolyot sihatgoh hududiga quladi. Voqea Naurizbay tumanidagi mikrotumanda soat 16.05da yuz bergan. Bu haqda Tengrinews.kz nashri xabar berdi. 

“Alatau” sihatgohining ochiq hududiga Sky Service aviakompaniyasining Eurocopter-130 markasidagi xususiy vertolyoti quladi”, deb ma'lum qilingan favqulodda vaziyatlar qo‘mitasida.

Vertolyotda 1968 yilda tug‘ilgan uchuvchi bo‘lgan. U tez yordam xodimlari kelguncha vafot etgan. Vertolyot Boralday – Katta Olmaota ko‘li yo‘nalishi bo‘yicha uchayotgan bo‘lgan.

Voqea tafsilotlari aniqlashtirilmoqda. Ushbu halokat yuzasidan tergov boshlangan. 

Eurocopter-130 bir motorli yengil vertolyot bo‘lib, Fransiyaning Eurocopter kompaniyasi tomonidan 1999 yildan beri ishlab chiqariladi. Qulagan vertolyot 2017 yilda ishlab chiqarilgan bo‘lgan.