Suriyada terrorchilar tufayli yetkazilgan zarar miqdori hisoblandi

Suriya sanoat vaziri Muhammad Man Jazbening aytishicha, terrorchilar harakati sababli Suriya sanoat sohasida 2,5 milliard dollardan ziyod mablag‘ni yo‘qotgan. Bu haqda RIA «Novosti» xabar bermoqda.

Jazbening so‘zlariga ko‘ra, jangarilar Suriya iqtisodiyotiga putur yetkazish uchun mamlakat sanoat obektlariga ataylab zarbalar berishgan.

«[Terrorchilar] obektlarni talon-toroj qilish bilan shug‘ullanib, infratuzilmani, ishlab chiqarish tarmoqlarini qasddan vayron qilganlar va Turkiyaga katta miqdorda uskunalarni olib chiqib ketishgan», - deya ta'kidlab o‘tdi Jazbe.

Vazirning hisob-kitoblariga ko‘ra, zarar 1,026 trln Suriya lirasini (2,5 milliard dollar) tashkil etdi.

Shuningdek, Jazbening qayd etishicha, rasmiylar nazorat ostiga olingan ko‘plab obektlarni qaytarib olishdi hamda ularni qayta tiklash bo‘yicha ishlar olib borilmoqda.

Eslatib o‘tamiz, avvalroq IShID Suriyani qancha vaqt ichida qayta egallab olishi mumkinligi hisoblab chiqilgandi.