O‘zbekistonda Qozog‘iston yili e'lon qilindi. Prezidentlar ishtirok etgan tadbirdan fotoreportaj

O‘tgan yili Qozog‘istonda O‘zbekiston yili keng miqyosda nishonlangandi, uning doirasidagi tadbirlar xalqlar o‘rtasidagi do‘stlik va qardoshlik munosabatlarni yanada mustahkamlashga xizmat qilgan.

Mazkur ulkan madaniy voqeaning mantiqiy davomi sifatida bu yil O‘zbekistonda Qozog‘iston yili e'lon qilindi va u Qozog‘iston prezidentining O‘zbekistonga davlat tashrifi doirasida ochildi.

15 aprel kuni Toshkent shahridagi «O‘zbekiston» xalqaro anjumanlar saroyida bo‘lib o‘tgan madaniy kechada O‘zbekiston va Qozog‘iston davlat rahbarlari ishtirok etib, nutq so‘zladi. Marosimni O‘zbekiston Respublikasi Prezidenti Shavkat Mirziyoyev ochib, qardosh qozog‘istonliklarni yurtimizga tashrifi bilan qutladi.  Qozog‘iston Prezidenti Qasim-Jomart Toqayev o‘z nutqida O‘zbekistonda qozoq tili va madaniyatini rivojlantirishga qaratilayotgan e'tibor uchun minnatdorlik bildirdi. 

Madaniy kecha qozog‘istonlik san'at ustalari tomonidan tayyorlangan konsert dasturiga ulanib ketdi.