Sudda tadbirkorlar himoyasini ta'minlashga doir yo‘riqnoma ishlab chiqildi

Savdo-sanoat palatasi sudlarda tadbirkorlik sub'yektlarining huquqlari va qonuniy manfaatlari himoyalanishini ta'minlashga doir yo‘riqnomani ishlab chiqdi. Bu haqda Norma xabar bermoqda.
 
Hujjatda Savdo-sanoat palatasi sud idoralarida o‘z a'zolarining huquqlari va qonuniy manfaatlari himoyalanishini ta'minlash tartibi belgilangan.
 
SSP davlat organlarining qarorlari, ular mansabdor shaxslarining harakatlari (harakatsizligi) ustidan shikoyat qilinganda tadbirkorlik sub'yekti nomidan sud muhokamasining istalgan bosqichida ishtirok etish, shuningdek da'vo arizalari bilan bir qatorda apellyatsiya, kassatsiya shikoyatlari, arizalar, shu jumladan nazorat tartibida protest keltirish haqida iltimosnomalar berish huquqiga ega («O‘zbekiston Respublikasi Savdo-sanoat palatasi to‘g‘risida»gi Qonunning 21-moddasi).
 
Bu holda da'vo arizalari (arizalar) davlat bojini to‘lamasdan taqdim etiladi (Soliq kodeksining 329, 330 va 330-1-moddalari).