Jurnalistlarga bosim o‘tkazganlik uchun javobgarlik belgilanishi kutilmoqda ─ Adliya vazirligi

Prezident topshirig‘iga asosan Adliya vazirligi tomonidan jurnalistlarga ma'lumot taqdim etmaslik yoki noto‘g‘ri ma'lumot taqdim etish, shuningdek, ularning faoliyatiga to‘sqinlik qilish va jurnalistlarga bosim o‘tkazganligi uchun davlat organlarining javobgarligi masalasini qonunchilikka kiritish bo‘yicha ishlar olib borilmoqda. Bu haqda Adliya vaziri o‘rinbosari Xudoyor Meliyev «Media-savodxonlik va fake-news» mavzusidagi seminarda ma'lum qildi.

Axborot tarqatish huquqi va mas'uliyati, yolg‘on ma'lumot tarqatganlik uchun javobgarlik masalalari muhokama qilingan seminarda «Ommaviy axborot vositalari mustaqilligini ta'minlash hamda davlat organlari va tashkilotlari axborot xizmatlari faoliyatini rivojlantirish bo‘yicha qo‘shimcha chora-tadbirlar to‘g‘risida» gi Prezident Qarorida belgilangan vazifalar muhokama qilindi.

Qarorga muvofiq, Adliya vazirligi ikki oy muddatda O‘zbekiston Respublikasi Vazirlar Mahkamasiga davlat organlari va tashkilotlari tomonidan ma'lumot taqdim etmaganlik yoki noto‘g‘ri ma'lumot taqdim etganlik, shuningdek, ommaviy axborot vositalari faoliyatiga to‘sqinlik qilganlik va jurnalistlarga bosim o‘tkazganlik uchun javobgarlikni belgilash to‘g‘risida takliflar kiritishi belgilangan.

«Jurnalistik faoliyatga to‘sqinlik qilish, noto‘g‘ri ma'lumot berish yoki ma'lumot bermaslik yuzasidan davlat organlariga javobgarlik belgilanadi. Bu javobgarlikning tartibi, ko‘rinishi bo‘yicha vazirlik professional qatlam, ya'ni jurnalist va blogerlardan takliflar kutadi», ─ deya ta'kidladi Xudoyor Meliyev.