Alixonov: O‘zbekistondagi AES hatto ustiga samolyot tushishiga ham dosh bera oladi

O‘zbekiston Respublikasi Oliy Majlisi Qonunchilik palatasi spikeri o‘rinbosari Boriy Alixonov Jizzax viloyati Forish tumani aholisiga hududda qurilishi mo‘ljallangan AES hech qanday tahdid tug‘dirmasligini kafolatladi.

«Biz qurmoqchi bo‘lgan stansiya 9 ballik zilzilaga bardosh beradi. Hattoki, samolyot stansiya ustiga tushgan taqdirda ham, u o‘z ishini davom ettirishi mumkin », - dedi Alixonov yakshanba kungi jamoatchilik eshituvlarida.

Uning so‘zlariga ko‘ra, AES xavfsizligi 21ta passiv va aktiv tizimlar bilan ta'minlanadi. Deputatning ishontirishicha, atrof-muhitga ham hech qanday tahdid yo‘q.

«Vengriyada suv Dunaydan olinadi. Uni hech qanday tozalashsiz qayta tushirishadi, sababi radioaktiv moddalar bilan aloqasi bo‘lmaydi. Garchi u transchegaraviy suv havzasi bo‘lsa-da - Amudaryodan ko‘ra hajmi ikki baravar ko‘p. Bu jihatdan ekologik xavfsizlik juda yuqori. Xalqaro atom energiyasi agentligi «3+» texnologiyasini eng ishonchli deb bekorga tan olgani yo‘q», - deya qo‘shimcha qilib o‘tdi Alixonov.

O‘zbekistondagi birinchi AES har biri 1 200 MVt quvvatga ega «3+» avlodidagi 1200-suv energetik reaktorli energoblokdan iborat bo‘ladi. Birinchi energoblokni 2028 yilgacha ishga tushirish rejalashtirilmoqda, ikkinchisi - 2030 yil.

O‘zbekiston va Rossiya atom elektr stansiyasi uchun qurilish maydonchasini aniqladi. Bu Jizzax viloyatining Tuzkon ko‘li yaqinidagi hudud bo‘ladi.