Burkina-Fasoda Kanada kompaniyasi avtokarvoniga hujum qilinishi oqibatida 37 kishi halok bo‘ldi

Burkina-Fasoda oltin qazish bilan shug‘ullanuvchi tog‘-kon kompaniyasi avtokarvoniga hujum qilinishi oqibatida 37 kishi halok bo‘ldi, 60 kishi yaralandi. Bu haqda Faso portali xabar berdi. 

Noma'lum kimsalar mamlakat sharqidagi Bungu koniga ishchilarni olib ketayotgan 5 ta avtobusdan iborat karvonga hujum qilgan. Jangarilar dastlab portlash uyushtirib, so‘ngra o‘t ochgan. Karvonni harbiylar qo‘riqlab borgan. Avtobuslarda Kanadaning SEMAFO kompaniyasi xodimlari bo‘lgan.

Burkina-Fasoda oltin qazib olish oxirgi o‘n yillikda avj oldi. Mamlakat oltin qazib olish hajmi bo‘yicha Afrikada 4-o‘rinni egallaydi. Burkina-Fasoda 14 ta sanoat koni hamda ko‘p miqdorda mayda artellar faoliyat yuritadi. Ular tez-tez banditlar hujumiga uchrab turadi.