So‘rov: kommunal sohada iste'molchilarning huquqlari ko‘proq buzilmoqda

Monopoliyaga qarshi kurashish qo‘mitasi iste'molchilar o‘rtasida huquqlarining buzilishi bo‘yicha o‘tkazilgan onlayn-so‘rovni yakunladi va uning natijalarini e'lon qildi.

Qo‘mita matbuot xizmatiga ko‘ra, jami bo‘lib 1005 ta ovozdan deyarli 60 foizi kommunal xizmatlarni ko‘rsatish sohasi, 14 foizi – savdo sohasi, 13 foizi – qurilish sohasi, 8 foizi – xizmat ko‘rsatish va servis sohasi hamda 5 foizi – reklama sohasida iste'molchilarning huquqlarini buzilganini ko‘rsatdi.

Kommunal soha xizmatlari bo‘yicha berilgan 956 ta ovoz ichida eng muammoli murojaatlar: tabiiy gazni yetkazib berish – 33 foiz, 31 foiz ovoz esa issiqlik energiyasini yetkazib berishga to‘g‘ri kelgan. So‘rovda qatnashgan iste'molchilarning deyarli 22 foizi elektr energiyasini yetkazib berish bilan bog‘liq muammolarga duch kelganlar. “Suvsoz” va “Maxsustrans” korxonalari tomonidan ko‘rsatiladigan xizmatlar esa bir xil ko‘rsatkichga ega – ya'ni 7 foizdan.

Bundan tashqari, 1031 ta iste'molchi shuningdek, mobil operatorlari, internet provayderlar va bank-moliya sektori xizmatlari sifati bo‘yicha o‘z fikrlarini qoldirganlar. Ularning ichida eng sifatsiz xizmat sifatida internet provayderlarning xizmatlari ko‘rsatilib – ular 39 foizni tashkil qilgan, undan keyin mobil operatorlari xizmatlari – 36 foiz va bank xizmatlari – 25 foizni tashkil etgan.

Transport xizmati ko‘rsatish tizimi bo‘yicha so‘rovda qatnashganlarning (1058ta) 65 foizi tomonidan shahar transporti talab darajasida emas degan fikr bildirilgan, bu ko‘rsatkich temir yo‘llarda aholi tashishlar bo‘yicha – 18 foizni va aviatsiya xizmatlari bo‘yicha – 17 foizni tashkil qilgan.

“So‘rovni o‘tkazishdan ko‘zlangan maqsad – ko‘rsatilayotgan xizmat iste'molchi tomonidan qanday baholanayotganini bilishdan iborat.

Hurmatli kommunal xizmatlar ko‘rsatish sohasida faoliyat olib borayotgan korxona va tashkilotlar, IT-kommunikatsiya sohasidagi kompaniyalar va yo‘lovchi tashuvchi korxonalar, sizlardan iltimos, iste'molchilarga ko‘rsatilayotgan xizmatlarning sifatiga e'tibor qarating!

O‘zbekiston Respublikasi Monopoliyaga qarshi kurashish qo‘mitasi va uning huzuridagi Iste'molchilar huquqlarini himoya qilish agentligi haq-huquqi buzilgan har bir iste'molchiga yordam berishga tayyor!” - deyiladi qo‘mita saytida.