Imom Buxoriyning Samarqanddagi yodgorlik majmuasi yangi loyiha asosida qayta barpo etiladi

2017–2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Ilm, ma'rifat va raqamli iqtisodiyotni rivojlantirish yili”da amalga oshirishga oid davlat dasturi tasdiqlandi.

Qayd etilishicha, 2020 yil 1 aprelga qadar Vazirlar Mahkamasi farmoyishi loyihasi ishlab chiqiladi.

Loyihada Imom Buxoriyning Samarqanddagi yodgorlik majmuasini musulmon dunyosidagi ulug‘ maqomiga mos ravishda mutlaqo yangi loyiha asosida qayta barpo etish bo‘yicha chora-tadbirlar nazarda tutiladi.

Ijro uchun mas'ullar - Samarqand viloyati hokimligi, Qurilish vazirligi, Moliya vazirligi, Din ishlari bo‘yicha qo‘mita, vazirlik va idoralar.

Shuningdek, yurtimiz allomalari hayoti, ilmiy merosiga bag‘ishlangan va diniy bag‘rikenglik mavzularida xalqaro ilmiy-amaliy konferensiyalar hamda boshqa tadbirlar tashkil etiladi. Bunda:

Misrning Al-Azhar majmuasi bilan hamkorlikda Samarqandda “Imom Abu Mansur Moturidiy va moturidiya ta'limoti: o‘tmish va bugun” mavzusida xalqaro konferensiya o‘tkazish;

AYSeSKO xalqaro tashkiloti tomonidan Buxoro shahrining 2020 yilda “Islom olami madaniyati poytaxti” deb e'lon qilinishi munosabati bilan “O‘zbekiston – Islom sivilizatsiyasi markazi” xalqaro ilmiy-amaliy anjumanini o‘tkazish;

“Diniy bag‘rikenglik – davlat va jamiyat taraqqiyotining muhim omili” mavzusida xalqaro anjuman o‘tkazish;

Buxoro shahrida Abduxoliq G‘ijduvoniyning 915 yilligi va Bahouddin Naqshbandning 700 yilligiga bag‘ishlangan xalqaro ilmiy konferensiya hamda uning tavallud ayyomini yuqori saviyada o‘tkazish bo‘yicha chora-tadbirlar nazarda tutiladi.