Facebook guruhli videoqo‘ng‘iroqlar xizmatini ishga tushirmoqda

Facebook guruhli videoqo‘ng‘iroqlarni amalga oshirish imkonini beruvchi Messenger Rooms xizmatini ishga tushirayotganini ma'lum qildi. Xabar qilinishicha, videoqo‘ng‘iroqlarda bir vaqtning o‘zida 50 nafargacha kishi qatnashishi mumkin, suhbatlashish vaqti chegaralanmagan.

Videokonferensiyani Facebook yoki Facebook Messenger akkauntlari orqali tashkil etish mumkin, bunda ijtimoiy tarmoqda ro‘yxatdan o‘tmaganlar ham videoqo‘ng‘iroqqa qo‘shilishi mumkin.

Messenger Rooms ushbu haftada qator davlatlarda paydo bo‘lishi kutilmoqda, so‘ngra xizmat barcha foydalanuvchilar uchun ishga tushadi.

Kompaniya ushbu xizmat Instagram va WhatsApp messenjerida ham yo‘lga qo‘yilishini ma'lum qilgan. WhatsApp videokonferensiyalarida bir vaqtning o‘zida sakkiztagacha kishi qatnashishi mumkin bo‘ladi.

Avvalroq Telegram messenjeri guruhli videoqo‘ng‘iroqlar funksiyasi ishga tushirilishi haqida e'lon qilgandi.