Janubiy Koreyada juma va taroveh namozlarini masjidda o‘qishga ruxsat berildi

Janubiy Koreyada koronavirus epidemiyasi sababli fevral oyining so‘nggi haftasidan boshlab masjidlar faoliyati vaqtincha to‘xtatilgan edi. Shuningdek, 5 mayga qadar juma va taroveh ibodatlarini masjidlarda ado etish va iftorlik marosimlari o‘tkazishga cheklov qo‘yilgandi.

Endilikda, 6 maydan boshlab, qator talablarga rioya etgan holda juma va taroveh namozlarini jamoat bo‘lib o‘qishga ruxsat berildi.

Bunda:

• masjidga kirishda qo‘llarni antiseptik vositalari bilan tozalash,
• tibbiy niqobda bo‘lish,
• masjid ichida ham bir metrlik masofa saqlash,
• masjidga kirishda belgilangan ro‘yxatga ism-familiyalarini yozishlari talab etiladi.

Bu talablarga amal qilmaganlarga masjidga kirishga ruxsat berilmaydi.

Xabarda qo‘shimcha qilishicha, bu yil Koreyada zakot miqdori bir kishi uchun 7 ming von (taxminan 6 dollarga yaqin) etib belgilangan.

Ma'lumot uchun, Janubiy Koreyada 10800 dan ortiq kishiga Covid-19 tashxisi qo‘yilgan, shundan 9300ga yaqin bemor tuzalib, 254 kishi vafot etgan.

So‘nggi ikki haftadan beri kunlik zararlanishlar soni o‘rtacha 10tadan kamroqni tashkil etmoqda.